Полските власти ја зголемија безбедноста долж границата со Русија, откако минатата недела добиле предупредувања од военото разузнавање и од сојузничките служби за можни акти на саботажа, изјави шефот на полската полиција Марек Бороњ.
Според него, едно од сценаријата што се разгледуваат е обид вооружена група да ја премине границата, но властите засега не соопштуваат дополнителни детали за добиените информации.
Во седиштето на полската полиција во Варшава е формиран оперативен команден центар, а безбедносната операција се спроведува во Варминско-мазурското војводство долж границата со руската Калининградска област, како и во соседното Подлашко војводство, кое граничи со Литванија и Белорусија.
Во акцијата се ангажирани полициски сили од повеќе региони, антитерористички единици, припадници на армијата, граничната стража и разузнавачките служби.
„Полицијата ја обезбедува областа долж границата со Калининградската област поради можни настани што би можеле да доведат до акти на саботажа“, изјави Бороњ, додавајќи дека приоритет е заштитата на населението и критичната инфраструктура.
Паралелно со операцијата на терен, полската полиција им наредила на специјалните единици од 2 до 8 ноември да останат во своите бази и да бидат подготвени за итно распоредување доколку биде потребно.
Од полицијата соопштија дека службите се наоѓаат во состојба на зголемена готовност поради проценетите ризици од можни саботажи.
The post Полска ја засили безбедноста на границата со Русија по предупредување за можна саботажа appeared first on METRO.mk.
