Вицепремиерот и министер за транспорт Александар Николоски уверува дека железничкиот сообраќај ќе продолжи без прекин, и покрај големата штета што ја предизвика кражбата и уништувањето на електроенергетската инфраструктура кај Драчево.
Николоски соопшти дека вечерва одржал координациски состанок со директорот на „Македонски железници – Инфраструктура“, Синиша Ивановски, и директорот на „Македонски железници – Транспорт“, Дејан Кошутиќ, на кој биле договорени конкретни мерки за нормализирање на состојбата.
Според него, проектот за воведување на градскиот воз ќе стартува на 1 септември, согласно претходните најави. Истовремено, непречено ќе продолжи и карго железничкиот сообраќај на Коридорот 10, кој претставува најзначаен извор на приходи за железницата, како и патничките линии кон Велес, Гевгелија, Прилеп и Битола.
Министерот изрази очекување дека Министерството за внатрешни работи во најкус можен рок ќе ги идентификува сторителите на кражбата и тие ќе сносат одговорност за предизвиканата штета. Воедно, тој му се заблагодари на министерот за внатрешни работи Панче Тошковски за брзата реакција на полициските служби.
The post Николоски уверува: И покрај кражбата, градскиот воз стартува на 1 септември appeared first on Прва Скопска ТВ.
