Портпаролката на руското Министерство за надворешни работи, Марија Захарова, денеска изјави дека европските земји немаат што да бараат на преговарачката маса за решавање на конфликтот во Украина.
Како што пренесува „РИА Новости“, таа го изјави тоа коментирајќи ги првите воени вежби на таканаречените мултинационални сили за Украина, организирани во рамките на иницијативата „Коалиција на волните“.
Захарова оцени дека вежбите уште еднаш потврдуваат оти за Европјаните нема место во преговорите и предупреди дека за Москва распоредувањето странски воени контингенти во Украина е категорично неприфатливо и дека би претставувало воена интервенција.
„Секој воен контингент на територијата на Украина ќе се смета за легитимна цел“, наведе Захарова.
Таа одговорноста за евентуалната ескалација им ја припиша на оние кои, како што рече, покренуваат нови воени авантури против Русија во обид да остварат нејзин „стратешки пораз“.
Трилатералните преговори меѓу делегациите на Русија, Украина и Соединетите Американски Држави би требало да се одржат на 10 и 11 ноември во Абу Даби, зад затворени врати, а тема ќе бидат безбедносните гаранции за страните во конфликтот.