Хрватската полиција спречила планиран напад врз двајца сезонски работници, државјани на Србија, на островот Хвар и привела 14 хрватски државјани осомничени дека се договориле да извршат кривично дело. Според хрватските медиуми, станува збор за припадници на навивачката група Торцида.Од Полициската управа Сплитско-далматинска соопштија дека полициска патрола во четврток попладне, во близина на еден хотел, забележала две возила во кои се наоѓале вкупно 14 лица. По нивната идентификација и претресот на возилата, биле пронајдени предмети погодни за напад и нанесување повреди, како и средства за прикривање на идентитетот.Во возилата биле откриени дрвени палки, телескопска палка и повеќе поткапи, односно фантомки. Сите предмети биле одземени, а 14-те лица биле уапсени.Според истрагата, 12 од осомничените претходно со глисер пристигнале од Трогир и Каштела до заливот Стинива Брушка на Хвар, каде што ги чекале уште две лица со комбе и патничко возило. Полицијата се сомнева дека планирале физичка пресметка со двајцата сезонски работници од Србија сместени во хотелот.Осомничените се на возраст меѓу 18 и 33 години и против сите ќе биде поднесена кривична пријава за договарање извршување кривично дело. Четворица од нив се предадени во притвор, додека глисерот, возилата и пронајдените предмети се привремено одземени до одлука на судот.