Владата донесе одлука за прогласување кризна состојба во Општина Гостивар во траење од 30 дена поради состојбата со водоснабдителниот систем и последиците од загадувањето на водата за пиење.

Одлуката е донесена бидејќи, како што информираат од Владата, локалната самоуправа не можела сама да се справи со настанатата состојба. Целта е да се обезбеди побрза координација меѓу институциите, ставање на водоснабдителниот систем во функција и обезбедување безбедна вода за пиење за граѓаните во најкус можен рок.

„Здравјето на граѓаните на Општина Гостивар останува фокус на Владата и посветени сме кон целосно решавање на овој проблем“, соопшти владината прес-служба.

Од Владата очекуваат Јавното обвинителство да спроведе детална истрага за случајот и да ја утврди одговорноста на сите лица кои евентуално го ставиле во ризик здравјето и животите на гостиварци.

Во меѓувреме, Основниот суд во Гостивар им определи 30-дневен притвор на тројцата осомничени во истрагата за загадувањето на водата за пиење, прифаќајќи го предлогот на Основното јавно обвинителство Гостивар.

Притвор е определен за вршителката на должност директор на ЈП „Комуналец“ – Гостивар, Артана Асани, раководителот на Одделението за водовод, Вадедин Даути, и техничкиот директор на претпријатието, Леон Мезини.

Обвинителството ги товари осомничените за тешки дела против животната средина и природата, поврзани со загадување на вода за пиење. За ова кривично дело е предвидена затворска казна од најмалку четири години.

Истрагата беше отворена по пријавите за загадување на водата во Гостивар. Надлежните извршија проверки на терен, обезбедија документација од ЈП „Комуналец“ и земаа мостри од повеќе локации.

Според досегашните информации од Обвинителството, анализите покажале присуство на колиформни бактерии на една од испитуваните точки, како и зголемена концентрација на хлор во еден од примероците.

Од Обвинителството претходно информираа дека истрагата продолжува и дека не е исклучена можноста таа да биде проширена со други лица доколку бидат обезбедени нови докази.

The post Владата прогласи кризна состојба во Гостивар, тројца осомничени добија притвор appeared first on Скопско ЕХО.