Складиштето на водечката руска интернет-продавница „Вилдберис“ (Wildberries) во Ленинградската област, во близина на Санкт Петербург, се запали по украински напад со беспилотни летала, изјави гувернерот Александар Дрозденко.
Три лица се повредени, додаде Дрозденко.
Компанијата „Вилдберис“ соопшти дека два нејзини логистички објекти во регионот престанале со работа. Исто така, наведе дека вработените во нејзините складишта на полуостровот Крим се евакуирани.
Видеоснимката од нападот на „Ројтерс“ прикажува два големи облаци црн чад. Пет складишта на „Вилдберис“, односно околу 10 проценти од логистичкиот капацитет на компанијата, се нападнати од 18 јули.
Компанијата објави дека никаква стока не е оштетена во најновиот напад. Осум лица загинаа во нападите на 18 јули врз логистичките центри во градовите Котовск и Електростал.
Киев тврди дека „Вилдберис“ е дел од инфраструктурата која ѝ дава поддршка на руската армија. Русија негира дека компанијата има каква било поврзаност со воена опрема.
Заедно со помалите ривали, „Вилдберис“ и неговиот главен конкурент „Озон“ продаваат стоки и услуги во вредност од приближно 8,5 проценти од рускиот БДП и вработуваат четири милиони луѓе, односно повеќе од пет проценти од работната сила во земјата.