Уништено најголемото складиште за гориво во Европа, следуваше еден од најтешките напади врз цивили во Украина Масовните напади ја оштетија енергетската инфраструктура, станбените згради, медицинските установи…

Володимир Зеленски во своето вечерно обраќање на 2 ноември предупреди дека Русија подготвува уште еден напад од големи размери, а токму тоа и се случи во ноќта меѓу понеделникот и вторникот.

Русија во ноќта кон 3 ноември започна масовен ракетен напад и напад со беспилотни летала врз Украина, погодувајќи ја енергетската инфраструктура, станбените згради и медицинските установи ширум повеќе региони, при што беа повредени десетици луѓе. Руските сили распоредија стратешки бомбардери Ту-160 и Ту-95МС за лансирање крстосувачки ракети, заедно со балистички ракети и напаѓачки дронови, вклучувајќи и безпилотни летала од типот „Шахед“, пишува Kyiv Post.

Енергетската инфраструктура беше меѓу главните мети, а експлозии беа забележани во Харков, Днипро, Житомир и други градови. Силните удари предизвикаа и вонредни исклучувања на електричната енергија во Киев, Киевската Област и Днипропетровската Област, извести националниот оператор на мрежата „Укренерго“.

Меѓу најтешко погодените беше Харков, каде што рускиот напад оштети медицинска установа во градската четврт Немишљански, изјави градоначалникот Ихор Терехов.

„Во нападот врз медицинската установа во четврта Немишљански оштетени се повеќе од 1.000 прозорци во болницата и на блиските згради“, додаде Терехов.

Освен за Харков, воздухопловните сили издадоа предупредувања за руски напади со балистички проектили за Киев и за неколку други региони, вклучително и Днипропетровск (централна Украина), каде што беше погодена „критична инфраструктура“, според зборовите на началникот на локалната воена управа, Олександар Ганжа.

Овие напади врз големи делови од Украина ја поттикнаа соседна Полска да ги стави своите воздухопловни сили во состојба на приправност, според официјалното соопштение.

Од руска страна, градоначалникот на Москва, Сергеј Собјанин, извести дека околу 100 украински дронови биле неутрализирани додека летале кон главниот град.

Според локалните власти, во понеделникот руските воздушни напади врз училиште во кое се делела хуманитарна помош убиле најмалку 26 луѓе во Комишуваха во Запоришката Област, на југоистокот од Украина.

Овие напади уништија „секоја надеж за напредок кон мирот“, изјави украинскиот претседател Зеленски, додавајќи дека тоа е „уште еден доказ дека Русија не сака ниту деескалација ниту вистинска правда“.

Меѓутоа, во пресрет на меѓуизборите во САД во вторникот, американската администрација објави дека „разговори на работно ниво“ меѓу Русија и Украина ќе се одржат на 10 и 11 ноември во Абу Даби, со посредство на Соединетите Држави.

Последниот таков состанок се одржа во средината на февруари во Женева, Швајцарија, без никакви опипливи резултати бидејќи Русија, според Киев, ги задржа своите максималистички ставови.

Украинските дронови ден претходно погодија еден од најголемите јазли за транспорт на нафта во Европа во руската Самарска Област, известија во понеделникот независните медиуми, додека локалните власти го потврдија ноќниот напад во тој јужен регион без да наведат детали за штетата или за жртвите, пишува The Moscow Times.

Меѓународниот аеродром „Курумоч“ во Самара привремено ги запре летовите на два часа за време на тревогата за воздушен напад.

Фотографиите од очевидци прикажуваат дека барем едно од таргетните постројки е линиската производствено-диспечерска станица на „Транснефт“. Сателитските снимки од НАСА исто така прикажаа голем, црн облак од чад како се крева на подрачјето каде што се наоѓа тоа постројка, југоисточно од главниот град на регионот, наведува The Moscow Times.

Станицата на „Транснефт“ се простира на 216 хектари и има 71 резервоар со вкупен капацитет од 1,6 милиони кубни метри. Прима сурова нафта од западен Сибир, Република Татарстан, Оренбуршката Област и Казахстан преку четири нафтоводи, по што ја насочува кон две рафинерии и извозниот нафтовод „Дружба“.

Казахстанското Министерство за енергетика се огласи во вторникот и соопшти дека повторно го започнало транзитот на нафта преку цевководот Атирау-Самара, откако нападите со дронови претходниот ден го принудија прекинот на неговата работа, јавува Reuters.

Во украинскиот напад со дронови оштетена е и рафинерија за нафта во рускиот град Јарослављ, изјави во вторникот локалниот гувернер Михаил Евраев, додека Министерството за одбрана соопшти дека во текот на ноќта соборило 856 непријателски дронови над руските региони.

Повредени се двајца вработени во рафинеријата во Јарослављ, а итните служби работат на гаснење на пожарот на местото на настанот, рече Евраев, пренесува Reuters.