Одлуката доаѓа по падот на способностите за читање и пишување, особено кај помладите ученици. Претседателот на парламентарната комисија за образование, Јоар Форсел, изјави дека властите ги враќаат традиционалните методи на учење бидејќи сметаат дека книгите се покорисни за децата.
„Ги повлекуваме екраните бидејќи веруваме дека книгите и потрадиционалните начини на учење се подобри за децата“, рече Форсел.
Со ова Шведска го следи поширокиот меѓународен пресврт во училиштата, по годините на силно потпирање на лаптопи, таблети и образовни апликации.
Слични мерки подготвува и Данска, додека во Финска минатиот август стапи на сила закон со кој се ограничува употребата на мобилни уреди во училиштата. Ограничувања се воведени и во други земји, од Шпанија до Јужна Кореја.
Иако станува збор за една од дигитално најразвиените образовни средини во светот, Шведска настојува да го намали дефокусирањето во училниците. Владата оваа година за набавка на учебници и прирачници за наставниците издвои 555 милиони шведски круни, односно 59 милиони долари.
Повод за промената беше и проценката на ПИСА од 2022 година, според која 24,3 отсто од шведските ученици во деветто одделение не го достигнале основното ниво на разбирање при читањето.
Во средното училиште „Малме Боргаскола“, мобилните телефони се веќе забранети за време на наставата, а учениците ги оставаат во кутија која ја нарекуваат „хотел за мобилни“.
Седумнаесетгодишната ученичка Мелина Салахи вели дека телефонот секогаш го одвлекува вниманието.
Заменик-директорот Патрик Сандер додаде дека и лаптопите сега се користат само кога наставниците го бараат тоа.
„Сега гледаме дека притисокот оди во спротивна насока. Се повлековме, откако научивме дека пишувањето со рака и со молив помага подобро да помните.“