САД ја укинаа забраната за ТикТок на службените уреди

Американскиот огранок на ТикТок функционира независно од компанијата ByteDance, објасни Министерството за правда.

Министерството за правда на САД соопшти дека федералните службеници сега можат да го преземаат и инсталираат ТикТок на електронските уреди што им ги обезбедила владата, со објаснување дека неговата моментална верзија не претставува ризик како претходната.

Во текот на 2022 година ТикТок беше забранет на речиси сите уреди издадени од сојузната влада на САД поради загриженост за националната безбедност. Крис Реј, тогашниот директор на ФБИ, предупреди дека Кина би можела да ја користи апликацијата за прибирање податоци за корисниците преку својата матична компанија ByteDance.

Во 2024 година, Претставничкиот дом на САД донесе закон со кој целосно би се забранил ТикТок во земјата доколку ByteDance не го продаде. Договорот за работењето на апликацијата во САД беше финализиран во јануари оваа година, што доведе до создавање ново правно лице под називот „TikTok USDS Joint Venture“. ByteDance задржа удел од скоро 20 отсто во новото претпријатие, додека остатокот го контролира група некинески инвеститори, вклучувајќи го и Oracle.

Кога беше објавен договорот, од ТикТок наведоа дека новото претпријатие ќе ги заштити податоците на американските корисници со помош на безбедното клауд опкружување на Oracle во САД. Исто така беше речено дека американскиот огранок ќе го обучува алгоритмот на ТикТок врз основа на податоци од луѓе од САД, со ветување до корисниците дека и понатаму ќе имаат пристап до меѓународна содржина.

Во соопштението на Министерството за правда се наведува: „Верзијата на ТикТок со која управува претпријатието ‘TikTok US Data Security Joint Venture’ не потпаѓа под оваа забрана бидејќи тоа заедничко претпријатие функционира независно од ByteDance, е во мнозинска сопственост на американски инвеститори и го ревидираше алгоритмот за препорачување содржини и програмата за сајбер-безбедност кои првично ги разви ByteDance, со цел информациите на сојузната влада да се изолираат од загрижувачките безбедносни карактеристики што првично и ја покренаа забраната“.

Меѓутоа, и понатаму останува на поединечните агенции да одлучат дали ќе им дозволат на своите вработени да преземаат ТикТок на службените телефони. „На пример, агенциите можат независно да одлучат да го забранат преземањето на ТикТок на владините уреди поради причини поврзани со управувањето со работната сила, како што е поттикнувањето на продуктивноста на вработените“, напиша Министерството за правда.