Лидерите на Европската Унија (ЕУ) и земјите-членки на Западен Балкан ќе се сретнат денес во Тиват, на самит кој треба да ја потврди силата на соработката на ЕУ со регионот, а на кој ќе присуствува и македонскиот премиер Христијан Мицкоски.
Самитот, кој се одржува под слоганот „Заеднички просперитет и стабилност на ЕУ и Западен Балкан“, ќе го води претседателот на Европскиот совет, Антонио Кошта, а домаќин ќе биде црногорскиот претседател Јаков Милатовиќ.
Заедно со Кошта, ЕУ ќе ја претставува претседателката на Европската комисија, Урсула фон дер Лајен, додека високата претставничка за надворешни работи и безбедносна политика, Каја Калас, го откажа своето учество поради здравствени причини.
За време на ручекот, лидерите ќе разговараат за проширувањето, а тоа ќе биде можност ЕУ да ја повтори својата целосна и недвосмислена посветеност на перспективата за членство на Западен Балкан во Унијата, објави претходно Европскиот совет.
Се очекува лидерите да го оценат напредокот постигнат во постепената интеграција на Западен Балкан во ЕУ и како таа понатаму да се унапреди, особено преку Планот за раст на Западен Балкан.
Според најавите, лидерите ќе разговараат за заедничките предизвици и како да се зајакне безбедноста и отпорноста, во услови на сè посложена геополитичка ситуација.
Лидерите ќе разговараат и за тоа како да се зголеми соработката во прашањата од надворешната, безбедносната и одбранбената политика, вклучително и преку зајакнување на вооружените сили на Западен Балкан преку Европскиот мировен фонд и градење отпорност на сајбер и други хибридни закани, со цел да се спротивстават на манипулациите и мешањето во странски информации.