Јеменските Хути соопштија дека извеле нови напади врз бродови во Црвеното Море и дека принудиле повеќе пловила да се вратат од теснецот Баб ел-Мандеб, дополнително зголемувајќи ги тензиите на Блискиот Исток. Овие случувања доаѓаат во време кога продолжуваат меѓусебните напади меѓу САД и Иран, а американската Централна команда соопшти дека веќе 13 ноќи по ред изведува воздушни напади врз ирански воени цели. Според CENTCOM, нападите се насочени кон воени командни центри, складишта за беспилотни летала, комуникациски мрежи и поморски капацитети со цел да се намали заканата за трговските бродови во Ормутскиот Теснец.
Хутите, кои имаат поддршка од Иран, тврдат дека погодиле два саудиски брода и предупредиле дека пловидбата кон саудиските пристаништа повеќе не е безбедна. Аналитичарите предупредуваат дека истовремените проблеми во Ормутскиот Теснец и Баб ел-Мандеб би можеле сериозно да ги нарушат глобалните синџири на снабдување и да предизвикаат раст на цените на енергенсите и транспортот. Хутите контролираат голем дел од северен Јемен уште од 2014 година и во изминатите години повеќепати напаѓаа трговски и воени бродови во Црвеното Море.
Претходните американски и британски воени операции не успеаја целосно да ги запрат нивните напади, поради што постои страв дека кризата повторно ќе се продлабочи. Во меѓувреме, Саудиска Арабија настојува да остане надвор од директниот конфликт меѓу Вашингтон и Техеран, иако нејзината енергетска инфраструктура повторно се наоѓа под зголемен ризик.
Дополнителна загриженост предизвикува договорот со кој американски компании ќе ѝ помогнат на Саудиска Арабија да развие цивилна нуклеарна програма. Иако официјално станува збор за мирнодопска програма, дел од експертите предупредуваат дека тоа може да поттикне нова трка во вооружување во регионот.
Во поширокиот контекст, прекинот на огнот во Газа останува кревок, а нестабилноста во повеќе делови од Блискиот Исток дополнително ги зголемува безбедносните ризици. Според оценките на аналитичарите, без политички договор меѓу САД и Иран, регионот би можел да влезе во подолг период на нестабилност со сериозни последици за светската економија и меѓународната трговија.
The post По Ормутскиот теснец, сега блокада и на Црвеното море, Хутите ги породолжуваат нападите врз бродови appeared first on Прва Скопска ТВ.
