Во последните 24 часа полицијата евидентирала шест случаи на семејно насилство низ државата, при што пет лица биле лишени од слобода, информира Министерството за внатрешни работи.
Во Струмица ноќеска била приведена 59-годишна жена од струмичко село, откако според пријавата физички ги нападнала својата снаа и малолетниот внук во семејниот дом. За случајот е известен јавен обвинител, а жената е задржана во полициска станица.
Во Гостивар бил уапсен 53-годишен маж кој, според пријавата, физички го нападнал својот син, а потоа со остар предмет им упатувал закани на него и на неговата мајка. Во Битола, пак, приведен е 35-годишник осомничен дека физички ја нападнал сопругата и ѝ нанел телесни повреди.
Полицијата во Велес го лишила од слобода 28-годишен велешанец, откако неговата мајка пријавила дека се заканувал, оштетувал инвентар и предизвикал страв кај членовите на семејството. Според МВР, тој не ги почитувал и претходно изречените судски мерки за заштита од семејно насилство.
Во Куманово бил приведен 39-годишен маж поради физички напад врз неговата 62-годишна мајка. Според пријавата, таа подолг период била изложена на психичко и физичко малтретирање од својот син.
Во меѓувреме, во СВР Скопје била пријавена уште една случка на семејно насилство, откако 41-годишна жена пријавила дека била физички нападната од нејзиниот сопруг во скопско.
Од МВР соопштија дека се преземаат мерки за целосно расчистување на сите случаи, по што против осомничените ќе бидат поднесени соодветни пријави.
