Новиот британски премиер Енди Барнам во понеделник ќе го пречека украинскиот претседател Володимир Зеленски како свој прв меѓународен гостин, што ја нагласува цврстата поддршка на Лондон за Украина, соопшти кабинетот на Барнам. Се очекува двајцата лидери да се сретнат во поморска база, каде што ќе слушнат како програмите за обука под водство на Обединетото Кралство помагаат во зајакнувањето на украинските вооружени сили и постигнуваат резултати на бојното поле, пренесува „Ројтерс“.
„Британија стои до Украина, рамо до рамо, и нашата поддршка останува непоколеблива. Русија не треба да има никакви сомнежи во нашата одлучност и нема да се откажеме сè додека не постигнеме траен и праведен мир за Украина“, рече Барнам во соопштението.
За време на посетата, Барнам и Зеленски ќе се сретнат со повеќе од 200 украински војници и морнари кои изминатите три недели во Британија учествуваа во вежбата „Sea Breeze“, поморска безбедносна и противминска вежба осмислена да ги подготви учесниците за идни мисии во Црното Море.
Претходникот на Барнам, Кир Стармер, го посети Киев неколку дена пред да се повлече од функцијата раниов месец, кога вети 300 милиони евра за да помогне во опремувањето на Украина со ескадрила од 16 шведски борбени авиони „Gripen“.