Економскиот развој на Северна Македонија е тесно поврзан со зајакнувањето на стратешките партнерства и продлабочувањето на соработката со пријателските земји, порачаа од коалицијата ВЛЕН, нагласувајќи дека конкретните чекори во областа на транспортот и инфраструктурата носат директни придобивки за домашната економија и бизнис-заедницата.
Според информациите од коалицијата, по повеќе од 12 години Северна Македонија и Турција повторно го активирале високиот дијалог за патен транспорт, што претставува значаен исчекор во унапредувањето на билатералните односи и економската соработка меѓу двете земји.
Во рамки на официјалната посета во Скопје, заменик-министерката за транспорт и врски Калтрина Зеколи остварила средба со заменик-министерот за транспорт и инфраструктура на Република Турција, Дурмуш Унувар. На средбата било разговарано за предизвиците и можностите во транспортниот сектор, како и за мерките што можат да придонесат за поефикасно движење на стоки и услуги меѓу двете држави.
Како резултат на разговорите, бил потпишан нов протокол за патен транспорт, со кој се предвидува зголемување на квотите за дозволи за меѓународен превоз на стока. Дополнително, договорено е и обезбедување нови дозволи за 2026 година, со цел да се одговори на растечките потреби на транспортните компании и да се олесни прекуграничниот транспорт.
Од ВЛЕН оценуваат дека новите договорени мерки ќе донесат директно олеснување за македонските и турските превозници, ќе ја зголемат ефикасноста на транспортните процеси и ќе придонесат за зголемен обем на трговска размена меѓу двете земји. Воедно, се очекува подобрената соработка да отвори нови можности за извозно ориентираните компании и да ја зголеми конкурентноста на домашната економија.
„Стратешките партнерства не се само дипломатски формалности, туку конкретни механизми што создаваат услови за економски раст, нови инвестиции и подобар животен стандард за граѓаните“, посочуваат од коалицијата.
Оттаму додаваат дека унапредувањето на транспортната инфраструктура и олеснувањето на меѓународниот товарен сообраќај остануваат меѓу клучните приоритети за забрзување на економскиот развој и зајакнување на регионалната поврзаност на Северна Македонија.
Обновувањето на високиот дијалог со Турција, според ВЛЕН, претставува уште една потврда за силните партнерски односи меѓу двете земји и за заедничката определба кон развој на економската соработка, трговијата и транспортниот сектор. ПОВРЗАНИ ВЕСТИ: [embed]https://politika.com.mk/archives/58588[/embed]The post НОВА ЕРА ВО ТРАНСПОРТОТ: ПОТПИШАН ДОГОВОР СО КЛУЧЕН ЕКОНОМСКИ ЕФЕКТ appeared first on Politika.