Силното невреме што вчера го погоди Скопје зад себе остави големи материјални штети на повеќе локации низ градот. Покрај паднатите дрвја, оштетените возила и покриви, на удар се најдоа и објекти од историско и институционално значење.
Меѓу оштетените е и препознатливиот часовник на Музејот на град Скопје. На фотографија што се прошири на социјалните мрежи може да се забележи дека е оштетена стрелката која ги означува секундите, како последица на силниот ветер што го зафати главниот град.
Покрај Музејот, невремето предизвика штети и на повеќе државни институции. Оштетени се објектите на Основното јавно обвинителство, комплексот „Вила Водно“, Аеродромската полициска база Петровец, зградата на „Нова Македонија“, како и објектите на Министерството за финансии, Министерството за земјоделство и Јавното обвинителство.
Надлежните служби продолжуваат со проценка на штетите и расчистување на последиците од невремето, додека се очекува во наредните денови да биде утврден целокупниот обем на материјалната штета.
The post Невремето го оштети и часовникот на Музејот на град Скопје appeared first on Прва Скопска ТВ.