Меланшон најавува излез на Франција од НАТО и национализација на одбранбената индустрија

Партијата на радикалната левица „Непокорена Франција“ (La France Insoumise), чиј претседателски кандидат е Жан-Лик Меланшон, објави официјална програма што предвидува излегување на земјата од НАТО и национализација на одбранбените компании. Според анкетите, Меланшон има изгледи за влез во вториот круг од претседателските избори следната година, пишува „Политико“.

„Веднаш да се повлечеме од интегрираната команда на НАТО, а потоа, етапно, и од самата организација. Да се одбие данокот што го бараат Соединетите Американски Држави во износ од 5% од БДП за трошоци за одбрана“, стои во програмата на 222 страници. Во документот сепак се додава дека Франција под раководство на Меланшон и понатаму би им пружала помош на членките на Европската Унија во согласност со договорите на ЕУ. Тоа е во согласност со она што лидерот на радикалната левица претходно го изјави за „Политико“.

Сè повеќе анкети го позиционираат Меланшон на второто место во пресрет на претседателските избори следната година, на кои се избира наследникот на Емануел Макрон. Двајцата кандидати со најмногу гласови влегуваат во вториот круг, каде што Меланшон би можел да се соочи со лидерката на радикалната десница, Марин Ле Пен. Таа исто така најавува повлекување на Франција од интегрираната команда на НАТО.

За разлика од партијата на Марин Ле Пен, „Непокорена Франција“ не наведува изрично дека би ја прекинала помошта за Украина, туку се залага за дипломатско решение. Секој мировен договор, како што се наведува, би морале да се темели врз „гаранции за колективна безбедност меѓу заратените страни и со остатокот од Европа“.

„Непокорена Франција“ бара и построга регулација на вооружувањето, што ги опфаќа смртоносните автономни оружени системи и нуклеарното оружје. Партијата се противи на „трката во вооружување во вселената“ и најавува затворање на вселенскиот центар на НАТО во Тулуз. Истовремено истакнува дека Франција мора да располага со средства за да го загарантира сопствениот суверенитет.

За разлика од повеќето други политички опции, „Непокорена Франција“ покажува голем интерес за вселенската политика, а во програмата наведува дека Франција би требало да набави вселенски брод (space shuttle). Пратениците од оваа партија претходно се залагаа Франција да го набави „Вортекс“ (Vortex) на компанијата „Дасо Авијација“ (Dassault Aviation). Станува збор за европска програма за повеќекратно употреблив орбитален вселенски авион со која раководи овој француски производител.

Програмата налага Франција повеќе да вложува во таканаречените клучни ресурси. Тоа се однесува на воената опрема во областите на комуникациите, разузнавачката работа и логистиката, која во моментов во рамките на НАТО главно ја обезбедуваат САД.

„Нивното производство мора да биде приоритет“, наведува партијата во програмата. Исто така, планираат да национализираат некои од главните одбранбени компании во земјата, меѓу кои е и „АријанаГруп“ (ArianeGroup). Еден од пратениците на „Непокорена Франција“ изјави за „Политико“ дека подетална програма, посветена исклучиво на одбраната, ќе биде објавена дополнително.