Повеќе интернет-портали и фејсбук-страници на македонски јазик, претставени како домашни информативни медиуми, се дел од организирана мрежа чии траги водат до бугарската „Фондација Македонија“ и нејзиниот основач Виктор Стојанов, покажува истражувањето на „360 степени“.
Иако најголемиот дел од објавите изгледаат како вообичаени дневни вести, дел од содржините се пласираат со внимателно избрани, провокативни наслови за македонско-бугарските односи, меѓуетничките прашања и идентитетските теми. Таквиот пристап редовно предизвикува жестоки расправии, национални навреди и говор на омраза во коментарите.
Само на Фејсбук, страниците опфатени со истражувањето имаат речиси 140 илјади следбеници. На тој начин, содржините добиваат широк досег, додека пред публиката се претставуваат како информации објавени од македонски медиуми.
Иста содржина, повеќе страници
Како пример за начинот на функционирање на мрежата, „360 степени“ го посочува интервјуто на Арбен Таравари за поткастот „Почетна пресметка“. На 13 јули 2026 година, делови од интервјуто биле објавени на сите пет анализирани фејсбук-страници, со наслови во кои се нагласува дека Македонците немале поблизок народ од Бугарите и дека Бугарите требало да бидат внесени во Уставот.
Токму ваквото селективно издвојување на изјавите, проследено со нагласено провокативни наслови, создава впечаток дека основната цел не е само информирање на јавноста, туку поттикнување поделби, конфликти и силни емоционални реакции.
Формулата, според истражувањето, речиси секогаш е иста: се објавува чувствителна тема од меѓудржавните или меѓуетничките односи, ѝ се дава провокативен агол, а потоа во коментарите следуваат препирки кои неретко прераснуваат во национални навреди и говор на омраза.
Кој стои зад порталите?
Сопствениците на фејсбук-страниците не се јавно наведени, но тие редовно споделуваат содржини од шест интернет-портали, од кои пет се регистрирани во Македонија.
Според податоците достапни преку МАРНЕТ, домените vestimak.mk и vestimk.mk се регистрирани на име на Александар Смиљков. Иако станува збор за две одделни интернет-страници, кај двете е наведена истата адреса за контакт – vestimak.mk@gmail.com.
Домените 24mk.mk, mk24.mk и utre.mk, пак, се регистрирани на име на Асен Петровски. И кај овие три портали е наведена заедничка адреса за контакт – v4vfoundation@yahoo.com.
Ваквото совпаѓање на контактите, координираното споделување содржини и идентичниот пристап при обработката на чувствителните теми, според „360 степени“, укажуваат дека не станува збор за изолирани медиумски појави, туку за поврзана мрежа.
Истрага за ширење расистички и ксенофобичен материјал
Во анализата се потсетува и дека на 4 март 2026 година Јавното обвинителство соопшти дека е отворен предмет за сомнение за ширење расистички и ксенофобичен материјал преку компјутерски систем.
Името на осомничениот официјално не беше објавено, но повеќе медиуми, повикувајќи се на неофицијални информации, објавија дека станува збор за Виктор Стојанов, основач на бугарската „Фондација Македонија“.
Од Јавното обвинителство за „360 степени“ потврдиле дека постапката сè уште е во тек, дека се обезбедуваат докази и дека се вршат потребните вештачења.
Според неофицијални информации наведени во истражувањето, повеќе од 20 портали во Македонија се проверуваат од надлежните институции поради сомневања за ширење говор на омраза.
Истражувањето отвора сериозно прашање за тоа колку лесно интернет-портали и страници што визуелно и јазично се претставуваат како македонски медиуми можат да бидат употребени за туѓо политичко и пропагандно влијание. Зад привидот на секојдневно информирање, според објавените сознанија, се создава простор за продлабочување на поделбите и за ширење пораки насочени против македонскиот идентитет.The post МАКЕДОНСКИ ИМИЊА, БУГАРСКИ КОНЦИ: Кој ја плете медиумската мрежа против Македонците? appeared first on Politika.
