Многу пациенти не се чувствуваат пријатно да разговараат со својот лекар за чувствителни теми, како што се консумирањето алкохол, пушењето или редовното земање терапија. Сепак, лекарот и истражувач д-р Роналд Епстин предупредува дека премолчувањето на важни информации може да има сериозни последици по здравјето.Тој смета дека искрената комуникација меѓу лекарот и пациентот е клучна за квалитетна здравствена грижа и посочува три работи за кои пациентите секогаш треба да бидат отворени.Првата се однесува на лековите што ги земаат. Лекарите треба да имаат точни информации за терапијата на пациентот за да можат да ги проценат можните несакани ефекти, интеракциите меѓу лековите и потенцијалните ризици.Втората важна тема е дали пациентите ги земаат лековите онака како што им се препишани. Според д-р Епстин, прескокнувањето дози или неправилното користење на терапијата во одредени случаи може да има сериозни последици.„Ако станува збор за лекови кај кои пропуштањето на дозата може да предизвика сериозни последици, тогаш тоа може да биде прашање на живот и смрт“, истакнува тој.Третата тема се однесува на употребата на алкохол, тутун и други супстанци. Лекарот нагласува дека е важно пациентите искрено да кажат дали ги користат и колку често.„Клучното прашање што пациентите и нивните семејства треба да си го постават е: дали премолчувањето на овие информации ќе го загрози или ќе го подобри здравјето на таа личност?“, вели д-р Епстин.Тој додава дека лекарите треба да создадат средина во која пациентите ќе се чувствуваат доволно безбедно и без осуда да зборуваат отворено за своите навики и здравствени состојби.