Корисниците на Инстаграм конечно ја добија можноста која со години се наоѓаше меѓу најбараните барања на заедницата. Друштвената мрежа во сопственост на Мета овозможи преуредување на објавите на профилот, па затоа веќе не е неопходно содржината да биде прикажана исклучиво по хронолошки редослед.

Новата опција пристигнува речиси една година откако нејзиното доаѓање го најави првиот човек на Инстаграм, Адам Мосери. Благодарение на оваа функција, корисниците сега можат слободно да ги преместуваат објавите во рамките на мрежата на својот профил, без оглед на тоа кога биле првично објавени, односно колку се стари.

Од Мета порачуваат дека се свесни оти станува збор за функционалност која корисниците долго ја посакувале. „Знаеме дека многумина ја чекаа оваа можност со години, но сакавме да бидеме сигурни дека ќе функционира како што треба пред да ја пуштиме за сите“, наведоа од компанијата.

Можноста за уредување на изгледот на профилот беше меѓу најчесто бараните надградби уште пред неколку години. Истражувачот на апликации Алесандро Палуци, познат по откривањето нови функции преку анализа на програмскиот код, уште во 2022 година пронајде траги од алатката под името „Edit Grid“, што укажуваше на тоа дека Инстаграм уште тогаш работел на нејзиниот развој.

Користењето на новата опција е многу едноставно. Доволно е да го отворите сопствениот профил и подолго да притиснете на саканата објава. Покрај постојните опции за „закачување“ (pinning) на објавата на врвот на профилот или нејзино архивирање, сега се појавува и новата можност за преуредување.

По изборот на таа опција се отвора посебен приказ во кој со повлекување и преместување (drag and drop) на објавите е можно да се подреди профилот според сопствените желби. На тој начин, корисниците можат да креираат визуелен распоред кој подобро одговара на нивната естетика или на стратегијата за претставување на содржините.

Важно е да се напомене дека објавите што претходно биле „закачени“ на врвот на профилот и понатаму ќе останат на тоа место. Во режимот за уредување на мрежата тие ќе бидат посебно означени и нема да биде можно да се преместуваат додека се активно закачени.