Лора Лумер, инфлуенсерка и блиска сојузничка на Доналд Трамп, во четвртокот во Киев се сретна со украинскиот претседател Володимир Зеленски, по нејзината нагла промена на ставот за руската инвазија врз Украина.
Лумер со години го намалуваше значењето на руската инвазија и ја критикуваше американската поддршка за украинската одбрана, а оваа недела на социјалните мрежи објави дека го променила мислењето откако во Украина доживеала воздушна опасност.
„Штотуку ја доживеав мојата прва воздушна опасност во Украина. Сирените ечат. Ова е секојдневие за секој Украинец. Често велев дека не ми е грижа. Гледајќи наназад, тоа не беше баш убаво од моја страна да го кажам“, порача таа на „Х“.
Среќавањето со Зеленски го потврди портпаролот на претседателот, Дмитро Литвин, кој изјави дека ниту една украинска државна институција не ја организирала посетата. Тој додаде дека кабинетот на претседателот дознал за нејзиниот престој во Украина преку социјалните мрежи.
Од кабинетот на претседателот претходно порачаа: „Навистина е важно што Лора Лумер е во Украина и што со свои очи ги гледа работите онакви какви што се.“
Во видеоснимка од украинската црква Киевско-печерска лавра, која претрпе сериозни оштетувања, Лумер го обвини рускиот претседател Владимир Путин за лицемерие поради претставувањето на Русија како заштитничка на христијанството.
„Едноставно не мислам дека треба да ви биде дозволено да кажете дека го штитите христијанството ако се обидувате со дронови да го нападнете Исус Христос“, заклучи Лумер во снимката.