Американскиот претседател Доналд Трамп ќе учествува на работната сесија на лидерите на Г7 заедно со украинскиот претседател Володимир Зеленски, но нема да одржи посебна билатерална средба со него, потврди висок претставник на американската администрација.Самитот на Г7 се одржува од 15 до 17 јуни во францускиот град Евијан. Според најавите, Трамп ќе има одделни средби со францускиот претседател Емануел Макрон, како и со лидерите на Катар, Обединетите Арапски Емирати, Египет и Индија.Американскиот функционер, кој зборувал под услов на анонимност, оценил дека руското напредување на фронтот во Украина е „повеќе или помалку запрено“.„Сакаме војната да заврши што е можно побрзо“, изјавил тој.Во меѓувреме, продолжуваат борбите и нападите на двете страни. Руските власти соопштија дека во украински напад со дрон во Краснодарскиот регион загинало едно лице, а три лица биле повредени. Според локалните власти, делови од дронот предизвикале пожар на поморски терминал.Од украинска страна нема коментар за нападот во Краснодар, но Генералштабот на Украина потврди дека во текот на ноќта биле погодени објекти за преработка и транспорт на нафта во руската област Волгоград, како и цели во окупираните делови на Доњецк и Запорожје.Претходно, украинскиот претседател Зеленски изјави дека украинските сили погодиле повеќе инфраструктурни и воени цели длабоко на руска територија, меѓу кои и фабрика што произведувала компоненти за руски дронови и ракети.Во исто време, нуклеарната централа Запорожје повторно е приклучена на електроенергетската мрежа по завршувањето на поправките извршени за време на локален прекин на огнот посредуван од Меѓународната агенција за атомска енергија (МААЕ).Централата речиси три дена беше без надворешно напојување со електрична енергија, што е еден од најдолгите прекини од почетокот на војната. За тоа време, реакторите биле одржувани со помош на дизел-генератори за итни случаи.