Собранието во рамки на денешната 104.седница ја констатира оставката на вицепремиерот за добро владеење Арбен Фетаи. Вицепремиерот поднесе оставка на 1 јуни, за што соопшти преку социјалните мрежи. Во објавата на Фејсбук, Фетаи посочи дека од функцијата заминува со крената глава и чиста совест.

-Ова е добро смислена одлука, донесена со уверување дека во моменталните околности е најправедниот и најдостоинствениот чекор. Во текот на овие две години имав чест и привилегија да ѝ служам на земјата, придонесувајќи за реформи насочени кон зајакнување на одговорноста, транспарентноста и владеењето на правото. Им благодарам на сите што веруваа во мене, ме поддржуваа и соработуваа на ова патување. Дали сум целосно задоволен со постигнатото? Секако дека не. Секогаш има место за повеќе и за подобро. Но, дали работев со најголема посветеност да поставам цврсти темели на кои може да се гради понатаму? Без двоумење, да, наведува Фетаи.

Во оставката, тој изразува благодарност за укажаната доверба да ја врши функцијата вицепремиер за добро владеење, но додава дека во сегашните околности, повеќе не постојат неопходните услови за функцијата да ја извршува со потребната ефикасност и од тие причини се повлекува од должноста.

Со констатирањето на оставката, завршува мандатот на Фетаи како вицепремиер задолжен за добро владеење, а Владата треба да одлучи како ќе се пополни оваа позиција во наредниот период. Во меѓувреме премиерот Христијан Мицкоски најави Фетаи дека ќе оди во нашата мисија во Брисел.