Шпанија оваа година е членката на Европската Унија која е најмногу погодена од шумските пожари, со најголем удел на изгорена површина во однос на големината на земјата. Податоците од Коперникус, европската програма за набљудување на Земјата, покажуваат дека огнот уништил повеќе од 200.000 хектари, што е околу 0,4 отсто од шпанската територија. Евакуирани се повеќе од 90.000 луѓе, пишува „Еуроњуз“.

Со пожарите се бори и соседен Португал, кој со 0,3 отсто изгорена површина е на второто место во ЕУ. Во понеделникот властите прогласија највисок степен на опасност за сите окрузи во северна и централна Португалија, како и за јужниот округ Фаро во регионот Алгарве. Сепак, некои земји надвор од Европската Унија, како Украина и Црна Гора, бележат уште поголем процент на уништена површина.

Големи пожари ја зафатија и Франција, каде што се евакуирани околу 260.000 луѓе, а најтешко настрада југозападниот департман Жиронд. Европската Унија како целина е на пат кон најлошата сезона на пожари откако постојат мерењата.

Европскиот информативен систем за шумски пожари (EFFIS) наведува дека во 2026 година веќе се забележани околу 1.200 пожари, што е повеќе од двојно во споредба со годишниот просек од 569.

Според податоците на Европската комисија, досега во ЕУ изгореа повеќе од 250.000 хектари, површина споредлива со цел Луксембург. Со оглед на тоа што пред нас е поголемиот дел од летото, вкупната изгорена површина би можела да го надмине рекордот од 2025 година, кога беа уништени повеќе од 270.000 хектари.

Коперникус проценува дека пожарите во Европската Унија оваа година во атмосферата веќе испуштиле повеќе од осум тони CO₂. За споредба, просечен граѓанин во текот на целата година емитува околу 5,55 тони.

За оваа недела се предвидува количество врнежи под просекот, па ситуацијата со пожарите веројатно дополнително ќе се влоши. Најголем недостиг на дожд се очекува на потегот од Франција, преку Алпите, па сè до Балканот.

Наспроти тоа, во Скандинавија и северна Европа се очекуваат врнежи над просекот. Коперникус објави дека најголемиот вишок врнежи ќе биде забележан токму над Скандинавија.