Турскиот претседател Реџеп Таип Ердоган изјави дека израелските воени дејствија во Сирија и Либан имаат последици и за други држави во регионот, вклучително и за Турција.„Безбедноста на Турција не почнува во Хатај, туку во Алепо, Дамаск и Бејрут“, порача Ердоган, додавајќи дека Анкара нема да толерира „свршени чинови“ во земјите што ги смета за братски и нема да остане нем набљудувач на, како што рече, агресијата.Турскиот претседател го обвини Израел дека се води од „илузијата за Ветената земја“ и предупреди дека доколку не биде запрено „израелското разбојништво“, последиците ќе ги почувствува целиот регион и светот.На овие изјави реагираше израелскиот премиер Бенјамин Нетанјаху, кој го нарече Ердоган „антисемитски диктатор“ и порача дека тој е „последната личност што може да ѝ држи морални лекции на Државата Израел“.Нетанјаху истакна дека Израел ќе продолжи „решително да дејствува против Иран и неговите сојузници“.Турција веќе подолг период е меѓу најгласните критичари на израелските воени операции во Газа, Иран и Либан. Ердоган претходно ја прекина трговската размена со Израел и ја повика меѓународната заедница да преземе построги мерки против израелската држава.