Еден министер остана, но кој ја плати цената? – реакција од СДСМ

Опозициската СДСМ остро реагира по одлуката на парламентарното мнозинство да не ја поддржи интерпелацијата за министерот за земјоделство Цветан Трипуновски, оценувајќи дека станува збор за уште еден обид да се избегне политичка одговорност за состојбите во земјоделскиот сектор.

Од партијата велат дека премиерот Христијан Мицкоски повторно застанал зад својот министер и покрај, како што тврдат, бројните реакции и незадоволството што во изминатиот период доаѓало од земјоделците ширум државата.

Според СДСМ, одбивањето на интерпелацијата претставува порака дека Владата не е подготвена да ги слушне проблемите со кои се соочуваат производителите на земјоделски производи. Оттаму посочуваат дека земјоделците се соочуваат со намалена финансиска поддршка, доцнење на субвенциите и укинување на дел од мерките кои претходно биле наменети за развој на секторот.

Во реакцијата се наведува дека тутунопроизводителите, лозарите, оризопроизводителите и сточарите се меѓу најпогодените категории, додека растечките трошоци за производство дополнително ја усложнуваат нивната економска состојба.

Особен акцент од СДСМ ставаат на состојбата во сточарството. Според нив, бројот на добиток се намалува, а сточарите се соочуваат со сè пониски откупни цени на млекото во услови кога малопродажните цени на прехранбените производи бележат раст.

Од партијата предупредуваат и на намален откуп од малите земјоделски производители, што според нив е показател за сериозни проблеми во производството и пласманот на домашните земјоделски производи.

СДСМ воедно потсетува и на наводите за корупциски скандали поврзани со ресорот, оценувајќи дека единствената причина поради која Трипуновски останува на функцијата е политичката поддршка што ја има од владејачкото мнозинство и од премиерот.

„Прво беше заштитен од одговорност за аферите што ги отвори јавноста, а сега и од политичка одговорност во Собранието. Но фактите и состојбите на терен не можат да се сокријат“, порачуваат од СДСМ.

The post ЕДЕН МИНИСТЕР ОСТАНА, НО КОЈ ЈА ПЛАТИ ЦЕНАТА? – реакција од СДСМ appeared first on Politika.