По драмата на летот на авионот кој вчера попладне полета од Белград кон Москва, а потоа беше вратен во Белград поради – како што се покажа – непочитување на безбедносните процедури поврзани со Александар Вулин, истиот авион замина за Москва и во текот на утринските часови слета во овој град.
Летот JU134 на „Ер Србија“ (накратко најследениот лет во светот) слета рутински утринава во Москва со променет екипаж (поради регулативата за работно време), но со истите – како што се покажа – повеќе од интересни патници, по доцнење од 7 часа, напиша уредникот на порталот „Танго сикс“ (Tango Six), Петар Војиновиќ.
Да потсетиме, авионот на компанијата „Ер Србија“ на летот JU134 за Москва синоќа беше вратен во Белград поради дополнителни безбедносни проверки на еден патник, соопшти компанијата. „Ер Србија“ не го откри идентитетот на патникот, но српскиот медиум Nova.rs повикувајки се на неофицијални извори објави дека станува збор за Александар Вулин, кој се качил во авионот без да биде спроведена безбедносна контрола. Враќањето на авионот, како што дознаваме, го наложил директорот за корпоративна безбедност на белградскиот аеродром, Милан Куч, поранешен припадник на единицата „Кобри“. Куч забележал на снимките од надзорните камери дека безбедносните процедури не биле испочитувани.
Авионот од типот „ербас А320“ полета од Белград во 18:48 часот, а беше вратен откако стигна до воздушниот простор над Литванија.
Компанијата „Ер Србија“ потврди дека летот JU134 на релација Белград – Москва беше вратен во Белград откако од надлежните аеродромски службы добила информација што барала спроведување дополнителни безбедносни проверки на еден патник.
Како што соопшти компанијата, одлуката за враќање е донесена во согласност со упатствата на надлежните служби и важечките безбедносни прописи.
„Екипажот на ‘Ер Србија’ постапуваше целосно според утврдените процедури и највисоките безбедносни стандарди“, наведоа од компанијата.
„Ер Србија“ исто така појасни дека контролата на патниците и багажот е во надлежност на аеродромскиот систем за безбедност и соодветните служби.
Во соопштението не беше наведено за кој патник станува збор, ниту што конкретно барало дополнителна проверка.
Според неофицијалните информации од синоќа, летот за Москва не бил откажан, а како што објави Војиновиќ, авионот утринава слетал во главниот град на Русија.
Српскиот медиум Nova.rs синоќа објави дека во авионот се наоѓале претседателот на Движењето на социјалистите Александар Вулин, директорот на „Србијагас“ Душан Бајатовиќ и претседателот на Српската народна партија Ненад Поповиќ.
Уште во текот на вчерашниот ден, претседателот на Демократската партија Срѓан Миливоевиќ на социјалната мрежа „Х“ постави прашање: Кој вечерва со летот во 18:30 часот „бега за Москва“.
Потоа црногорскиот портал ЕТВ објави дека Вулин и Поповиќ резервирале билети за тој лет, повикувајќи се на свои извори.
Подоцна се појави информација за промена на патеката на авионот, а сега и „Ер Србија“ официјално го потврди неговото враќање во Белград поради дополнителни безбедносни проверки.