Левица обвини дека во 2022 година, премиерот Христијан Мицкоски тврдеше дека поскапувањето на парното е пљачка на граѓаните, дека е последица на лоповлук и дека семејствата ќе плаќаат и до 120 евра повеќе годишно. Денес, според партијата, кога Мицкоски е премиер, за само осум месеци им приреди на скопјани две последователни поскапувања – 5,9% од декември 2025 година и нови 5,96% од август 2026 година, односно кумулативно зголемување од приближно 12,2%.

-Додека беше во опозиција, поскапувањето беше грабеж. Откако седна во премиерската фотелја, грабежот доби ново име: „минимална корекција“ и „најниска цена во регионот“. Очигледно, според енергетската доктрина на премиерот „енергетичар“, цената не зависи од трошоците и животниот стандард, туку од тоа кој ја контролира Владата. Кога сметките на граѓаните ги покачува ДПМНЕ, дури и тоа се обидуваат да го прикажат како е успех, посочувааат од Левица.

Од декември, просечната сметка беше зголемена за околу 130 денари. Од август следува ново зголемување од околу 140 денари за стан од 60 квадратни метри.

-Наместо да го спречи вториот удар врз семејните буџети, РКЕ под раководство на Ацо Ристов (бизнис пријателот и сопартијец на Мицкоски) го прогласува за минимално поскапување, како граѓаните да треба да бидат благодарни.

РКЕ не е аукциска куќа, ниту ценовен нотар на снабдувачите. Нејзина обврска е до последен денар да ги преиспита трошоците, загубите во мрежата, бројот и продуктивноста на вработените, оправданоста на инвестициите, набавните цени, регулираниот принос и секоја ставка што се вградува во крајната сметка, истакнуваат од партијата на Апасиев.

Според Левица, посебно навредлива е тезата дека Скопје имало поевтино парно од Белград, Љубљана, Софија или Сараево.

-Македонскиот работник не зема љубљанска плата, не располага со белградски семеен буџет и не живее со софиски приходи. Платите на македонскиот работник се најмизерни во Европа! Тој живее во Македонија, каде што храната, домувањето, струјата, водата и греењето секој месец одземаат сè поголем дел од платата.

Цената сама по себе не кажува ништо без куповната моќ. Единствената чесна споредба е колкав процент од минималната и просечната плата оди за парно? Колку работни часови му се потребни на еден работник за да ја плати сметката? Колкав дел од приходите останува на едно четиричлено семејство откако ќе ги плати основните потреби, прашуваат од Левица.

Партијата бара Владата и РКЕ да ја објават целосната пресметка на новата цена – колку изнесуваат реалните трошоци, колку се признати трошоци според тарифната методологија и колкав е регулираниот приход. Исто така, бара Владата да воведе автоматски механизам за заштита на домаќинствата со ниски приходи и да објаснат зошто илјадници домаќинства и понатаму плаќаат според квадратура, наместо според реално измерена потрошувачка.