Денес во Кочани, претседателот на Движењето ЗНАМ, Максим Димитриевски, заедно со партиското раководство, ги презентира резултатите од изминатите две години и ги испрати јасните пораки за принципите од кои ЗНАМ нема да отстапи.
Димитриевски порача дека за прашањата што ги засегаат македонскиот јазик, државниот суверенитет и почитувањето на Уставот и законите нема простор за политички пазарења. Осврнувајќи се на шпекулациите и барањата поврзани со полагањето на правосудниот испит, тој беше дециден дека ставот на ЗНАМ е јасен и непроменлив.
„Се додека е ЗНАМ дел од Владата, правосудниот испит ќе се полага согласно закон и Устав, на македонски јазик! Може да има различни барања, притисоци и шпекулации, но нашиот став е јасен. Тоа се нашите црвени линии и од нив нема да отстапиме. Законите и Уставот мора да се почитуваат, а македонскиот јазик е темел на нашиот државен идентитет. За принципите што ги застапуваме не бараме алиби и не прифаќаме компромиси што се спротивни на законите и Уставот“ истакна Димитриевски.
Претседателот на ЗНАМ се осврна и на случајот со Ива Михајлова, посочувајќи дека ниската излезност на изборите во Бугарија и апатичната атмосфера кај бугарските граѓани не смеат да се прикриваат преку создавање лажни политички теми, провокации и обиди за вршење притисок врз Република Македонија.
„Поразително ниската излезност на изборите во Бугарија и апатијата кај бугарските граѓани не можат да се покриваат со креирање лажни политички теми и обиди за политички притисок врз Македонија. Во однос на случајот со Ива Михајлова, ги повикувам бугарските власти да постапат согласно потерницата издадена од Министерството за внатрешни работи на Република Македонија и да ја екстрадираат за да одговара пред надлежните институции за случајот за кој се товари. Очекуваме почитување на правните процедури и соработка со надлежните институции. Македонија е суверена држава и нема да дозволиме создавањето лажни политички теми да го потисне почитувањето на правниот поредок“ нагласи Димитриевски.
На панел-дискусијата во Кочани се обратија и министерот за земјоделство, шумарство и водостопанство и потпретседател на ЗНАМ, Борче Серафимовски, пратеникот и потпретседател на Движењето, Павле Арсоски, како и директорот на Геолошкиот завод, Ивица Андов. Серафимовски ги презентираше мерките и активностите за поддршка на македонските земјоделци, јакнење на домашното производство и подобрување на условите за работа во земјоделството. Арсоски се осврна на улогата на Собранието во донесувањето на значајните законски решенија и реформските процеси, додека Андов зборуваше за потенцијалите на природните ресурси на Македонија и нивното одговорно искористување во функција на економскиот развој.
