Четири патнички авиони во Полска, Шпанија и Бугарија во вторникот се најдоа на мета на закани за поставени бомби, поради што беа покренати опсежни безбедносни проверки. Еден авион со 181 лице беше пренасочен кон друг аеродром, кој беше привремено затворен, додека останатите авиони слетаа на своите одредишта.

Повеќе европски аеродроми во вторник, на 3 ноември, беа соочени со закани за поставени бомби упатени кон патнички авиони. Безбедносните служби интервенираа во Полска, Шпанија и Бугарија, а патниците мораа да поминат низ дополнителни контроли.

Најсериозното нарушување се случи во Полска, каде што авион на полската компанија ЛОТ (LOT), кој леташе од лондонскиот „Хитроу“ кон главниот варшавски аеродром „Шопен“, беше пренасочен кон аеродромот „Модлин“.

Според соопштението на управата на аеродромот, узбуната беше прогласена во 9:54 часот, а леталото „Боинг 737 МАКС“ (Boeing 737 MAX) слета во Модлин само седум минути подоцна. Во авионот се наоѓаа вкупно 181 лице.

По слетувањето, авионот беше преместен на посебно одредена локација заради безбедносен преглед, а патниците го напуштија леталото.

Поради заканата, аеродромот „Модлин“, сместен на околу 36 километри од Варшава, привремено го прекина сообраќајот. Операциите подоцна беа продолжени, додека надлежните служби ги вршеа проверките.

Речиси истовремено, закана за поставена бомба беше упатена и до авион на компанијата САС (SAS) на летот од Копенхаген кон Варшава. Тој авион слета според планот на аеродромот „Шопен“, каде што го прегледаа безбедносните служби. Сообраќајот на главниот варшавски аеродром не беше целосно прекинат.

Слична ситуација се случи и во шпанска Мурсија, каде што беше упатена закана за поставена бомба до авион на „Рајанер“ (Ryanair) кој доаѓаше од Манчестер. Во авионот се наоѓаа 121 лице, вклучувајќи 114 патници и седум членови на екипажот.

Авионот безбедно слета во Мурсија, по што сите патници и членови на екипажот беа истоварени и упатени на безбедносни проверки. Шпанските власти активираа посебен безбедносен протокол, а на аеродромот беа испратени полицајци, припадници на специјализирани пиротехнички единици, противпожарни екипи и медицински персонал. За координација на постапувањето беше воспоставен и кризен штаб.

Според извештаите на бугарските медиуми, закана за поставена бомба била упатена и до авион кој од Израел летал кон Софија. Заканата била примена преку електронска пошта, а авионот слетал на софискиот аеродром, каде што биле покренати безбедносни проверки.

Засега нема потврда дека во кој било од авионите е пронајдена експлозивна направа.

Низата инциденти следуваше по узбуната што се случи во понеделникот, кога авион на „Визер“ (Wizz Air) на летот од лондонскиот „Лутон“ кон Софија, поради дојава за бомба, беше пренасочен кон Будимпешта. Унгарските власти подигнаа борбен авион кој го следеше патничкиот авион сè до слетувањето.

Авионот безбедно слета, а дополнителните проверки покажаа дека станува збор за лажна узбуна.