Германскиот министер за надворешни работи смета дека за неуспехот на кандидатурата се одговорни неколку фактори.
„Една од причините е нашата цврста поддршка за Украина, а Русија не сака таков глас во Советот за безбедност“, изјави Вадепул и додаде дека „не е тајна“ дека Москва поттикнувала антигерманско расположение. Русија не одговори на ваквите обвинувања.
Како втора можна причина тој го наведе односот на Германија кон Израел.
„Можно е гласови да нè чинеа и посебните обврски што Германија мора да ги преземе кон Израел во блискоисточниот конфликт“, рече тој. „Отсекогаш сме заземале јасен став за одредени прашања, а тие ставови не ги делат сите држави членки“, додаде Вадепул. Како една од причините за неуспехот тој го наведе и доцното вклучување на Германија во трката за двегодишниот мандат.
Германија во борбата за едно од двете места наменети за групата западноевропски и останати земји обезбеди 104 гласа. Португалија доби 134, а Австрија 131 глас. Покрај нив, во Советот за безбедност беа избрани и Киргистан, Тринидад и Тобаго и Зимбабве.
Советот за безбедност е единственото тело на ОН кое може да носи правно обврзувачки одлуки, како што се воведување санкции и одобрување употреба на сила. Покрај петте постојани членки – Кина, Франција, Русија, Обединетото Кралство и САД – советот има и десет привремени (привремени) членки.
Неуспехот во кандидатурата се смета за удар за германскиот канцелар Фридрих Мерц. Неговите критичари од опозициските партии истакнуваат дека Мерц сега е осрамотен во странство, откако се претставуваше како политичар кој ќе го зајакне угледот на Германија на меѓународната сцена, а веќе беше под притисок на домашен терен.
Мерц им честиташе на Австрија и Португалија и порача дека Германија и понатаму ќе биде силен поборник за меѓународниот поредок. „Овој исход не ги менува задачите што стојат пред нас во Обединетите нации. Германија останува сигурен столб на мултилатералниот систем“, изјави канцеларот.