Лидерот на ДУИ, Али Ахмети синоќа бил присутен во општина Брвеница каде што одржал говор по победата на Аркин Јахији. Тој рекол дека Брвеница е општина со албанско мнозинско население и дека на граѓаните е да имаат градоначалник Албанец.
Тој исто така порача дека Македонија не му припаѓа ниту на Христијан Мицкоски ниту на Бранко Црвенковски, туку на Албанците.
„Вечерва, сите Албанци ќе обрнат внимание на фактот дека Брвеница е општина со 65% Албанци и дека тоа зависи од градоначалникот Албанец. Би сакал да им се заблагодарам на сите оние кои денес одлучија за иднината на општината. Аркин денес е претставник на сите граѓани на општината“.
„Некои македонски политичари погрешија со тоа што го етикетираа нашиот претставник како криминалец. Избрзаните изјави не се добри за коегзистенцијата, бидејќи ние како лидери на партии не можеме да бидеме обвинители. Се надевам дека вакви грешки нема да се прават, туку ќе послужат за блискост и комуникација“, порачал Ахмети, пренесуваат дел од медиумите на албански јазик во земјава.
„Македонија не е ниту на Христијан ниту на Бранко Црвенковски, Македонија е татковина на Албанците кои се автохтони и кои не биле товар на никого, туку другите биле товар за нас. Ние сме државотворци и сме господари на оваа земја. Мора да бидеме поддржани во оваа наша позиција, толку е јасна за оние кои имаат дилема. Ние преземаме одговорност да ги движиме процесите напред за земјата што ни припаѓа“, порачал, меѓу другото Ахмети.