Советот на ЕУ, според најавите, формално ќе ја усвои одлуката на 4 јуни, по што преговорите можат да започнат со секоја земја во регионот поединечно, објави РСЕ.
Кипарското претседателство со ЕУ соопшти дека силно го поддржува европскиот пат на Западен Балкан.
„Проширувањето на зоната без роаминг е јасен знак за нашата посветеност кон регионот. Со нетрпение го очекуваме формалното усвојување на одлуката со која се одобрува отворање на преговори за договори“, изјави портпаролот на кипарското претседателство.
Во февруари, Европската комисија предложи укинување на роамингот за Западен Балкан.
„Роамирајте како дома“ се однесува на земјите-членки на ЕУ и земјите од Европската економска зона.
Во јануари оваа година, регулативата беше проширена на Украина и Молдавија, иако овие земји не се членки на ЕУ.
Европските претставници очекуваат преговорите да бидат завршени до крајот на оваа година.
Според РСЕ, идеално, роамингот помеѓу Западен Балкан и ЕУ би можел да се укине уште следната година, но европските претставници нагласуваат дека сè зависи од подготвеноста на земјите од регионот да напредуваат во овие преговори.
„Роаминг како дома“ е една од најуспешните политики на ЕУ насочена кон нејзините граѓани и е во сила од 2017 година. Тоа е регулатива на Европската комисија што дозволува користење мобилни телефони во други земји-членки по исти цени како и во матичната земја.
Ова значи дека при користење мобилен телефон во зоната на ЕУ, нема дополнителни трошоци за повици, СМС-пораки и користење интернет, но важат домашни тарифи. Истото правило важи и за повиците и пораките што корисниците ги добиваат додека престојуваат во странство.